दाङ—लुम्बिनी प्रदेशका भौतिक पूर्वाधार विकास मन्त्री भूमिश्वर ढकालले प्रदेश सरकारको बजेट निर्माण प्रक्रियालाई कपोकल्पित ढंगले अनावश्यक विवादमा तानिएकोप्रति गम्भीर ध्यानाकर्षण भएको बताउनु भएको छ ।
उहाँले बजेट निर्माण एक नियमित प्रक्रिया भएको र उक्त प्रक्रिया कुशलतापूर्वक सम्पन्न गरिए पनि त्यसलाई तोडमोड गरेर विवादास्पद बनाउन खोजिएकोमा आपत्ति जनाउनु भएको हो ।
‘बजेट निर्माण एउटा प्रक्रिया हो । त्यो पूरा भइसकेको छ । तर, यसलाई अनावश्यक रूपमा तोडमोड गरेर उछाल्न खोज्नुको कुनै औचित्य छैन,’ मन्त्री ढकालले भन्नुभयो,‘माननीय मुख्यमन्त्री हाम्रो अभिभावक हुनुहुन्छ । सोच्नै नसकिने विषयहरू जोडेर समाचार बनाउनु विश्वसनीय पत्रकारिता हहोइन । मर्यादित पत्रकारिताको मान्यता जोगाइराख्न जरुरी छ ।’
उहाँले सञ्चारजगतले आफ्नो विश्वास बचाइराख्नुपर्ने उल्लेख गर्दै तथ्यहीन प्रचारले नागरिकको विश्वास गुम्न सक्ने चेतावनी पनि दिनुभएको छ ।
मन्त्री ढकालका अनुसार लुम्बिनी प्रदेश सरकारले दोस्रो आवधिक योजनाले तोकेको दिगो विकास, समावेशीता र प्राथमिकताका आधारमा बजेट निर्माण गरेको हो ।
उहाँले बजेट प्रदेशको समग्र समृद्धि र विकासका लागि मार्गनिर्देशक हुने गरी तयार पारिएको स्पष्ट पार्नु भएको छ ।
तपाईको प्रतिक्रिया