तुल बहादुर कवँर मगर
देउखुरी । दाङको राप्ती गाउँपालिकामा पालिका क्षेत्र भित्र रहेका २ सय ९९ वटा कुकुरहरुको स्थायी बन्ध्याकरण गरिएको छ।
गाउँपालिका क्षेत्रमा सामुदायिक (छाडा) कुकुरको संख्या बढि भई किसानहरुको पशुचौपायलाई समेत क्षति पु¥याउन थालेपछि गाउँपालिकाले शिविर नै सञ्चालन गरेर कुकुरहरुको बन्ध्याकरण गरेको गाउँपालिकाका पशु सेवा शाखा प्रमुख जिवराज पौडेलले जानकारी दिनुभयो।
शिविरमा १ सय ७९ वटा भाले र १ सय २० वडा पोथी कुकुर गरि कुल २ सय ९९ वटा कुकुरहरुको स्थायी बन्ध्याकरण गरिएको छ।
गाउँपालिकाले भेटेरीनरी अस्पताल तथा पशु सेवा विज्ञ केन्द्र दाङ सँगको सहकार्य एवम् हिमालयन एनिमल रेस्क्यू कोष (पोखरा)को प्राविधिक सहयोगमा बन्ध्याकरण तथा रेविज खोप शिविर सञ्चालन गरेको थियो ।
शिविरमा कुकुरहरुको हिमालयन एनिमल रेस्क्यू कोष (पोखराका डाक्टर सोनिया गुरुङ , हिमासु पोख्रेल लगायतका डाक्टर तथा पशु प्राविधिकहरुले बन्ध्याकरण गर्नु भएको थियो ।
घरमा पालेको कुकुरहरुलाई बेलाबेलामा रेविज विरुद्धको भ्याक्सिन लगाउने गरे तापनि सामुदायिक (छाडा) कुकुरहरूको उपचार र भ्याक्सिनेसन गर्ने काम राज्यको भएको राप्ती गाउँपालिकाका अध्यक्ष प्रकाश विष्टले बताउनुभयो ।
उहाँले पशुपंक्षीहरु मध्ये कुकुर मानिसको सबै भन्दा नजिकको साथी भएको र घर लगायत अन्य काममा समेत सुरक्षा प्रदान गर्ने भएकाले कुकुरहरुको पालिकाले उन्मुलन नभई व्यवस्थित गर्न लागेको बताउनुभयो ।
त्यस्तै गाउँपालिकाकी उपाध्यक्ष कमलापती चौधरीले यस प्रकारको शिविर एक पटक मात्रै गरेर नहुने भन्दै पटकपटक आयोजना गर्न आवश्यक रहेको बताउनुभयो ।
गाउँपालिकाका प्रमुख प्रशासकीय अधिकृत नेब बहादुर ओलीले सामुदायिक कुकुरको संख्यामा कमी ल्याउन र रेबिजको प्रकोप न्यूनीकरण गर्नका लागि बन्ध्याकरण तथा रेविज खोप शिविरले ठुलो सहयोग पुग्ने बताउनुभयो ।
शिविरमा टोल–टोलमा पुगेर कुकुरलाई नियन्त्रणमा लिई शिविर स्थलमा ल्याई बन्ध्याकरण र उपचार गरिएको थियो। बन्ध्याकरण गरिएका कुकुरहरुलाई बन्ध्याकरण गरी नियन्त्रणमा लिएकै स्थानमा लगेर छोडिएको छ ।
शिविर मंसिर ११ गते देखि १७ गते सम्म पालिकाको वडा नं. ४ को गोपीनाला स्थित पशु उपचार केन्द्रमा सञ्चालन गरिएको थियो।
शिविरमा भेटेरीनरी अस्पताल तथा पशु सेवा विज्ञ केन्द्र दाङका डाक्टर प्रतिमा विष्ट,हिमालयन एनिमल रेस्क्यू कोष (पोखरा)का प्रमुख खगेश्वर भट्टराई लगायतको उपस्थिति रहेको थियो ।
तपाईको प्रतिक्रिया